ווידעאָ: די צוזאַמענשטויסן מיט דער פּאָליציי אין ירושלים — אויפֿן אָרט מיט עטל ניבאָרסקיVIDEO: The clashes with police in Jerusalem – on the scene with Ethel Niborski (in Yiddish)
עטל ניבאָרסקי בעת איינער פֿון די אַנטי־רעגירונג־פּראָטעסטן Photo by Omri Ash
אויף ייִדיש זעט מען זעלטן ווידעאָ־באַריכטן פֿון די לעצטע נײַעס. די וואָך האָט די יונגע ייִדיש־לערערין עטל ניבאָרסקי אָבער רעזשיסירט און נאַרירט אַ פֿאַרכאַפּנדיקן באַריכט אויפֿן אָרט פֿון איינער פֿון די אָנגייענדיקע דעמאָנסטראַציעס אין ירושלים, אַרײַננעמענדיק אַ צוזאַמענשטויס מיט דער פּאָליציי. דער באַריכט איז פּראָדוצירט געוואָרן דורכן פֿאָרווערטס.
אינעם באַריכט באַמערקט זי אַז כאָטש פֿון דרויסן זעט אפֿשר אויס ווי די דעמאָנסטראַנטן זענען פֿון איין שניט, באַשטייען זיי אין דער אמתן פֿון פֿאַרשידענע פּאָליטישע גרופּעס. זי באַשרײַבט אויך אַ שעפֿערישן מיטל ווי אַזוי די פּראָטעסטירער מײַדן אויס די עפֿעקטן פֿונעם „שטינקגאַז“ וואָס די פּאָליציי ניצן אויף זיי.
עטל ניבאָרסקי, אַ ייִדיש־לערערין וואָס האָט ערשט פֿאַרענדיקט לערנען סטודענטן אין דער וואַרשעווער ייִדיש־זומער־פּראָגראַם, איז אַ סטודענטקע בײַ דער קינאָ־שול אויפֿן נאָמען פֿון סעם שפּיגל אין ירושלים. זי איז די טאָכטער פֿון דער ייִדיש־פֿאָרשערין מרים טרין און ייִדיש־לערער אליעזר ניבאָרסקי און דאָס אייניקל פֿון יצחק ניבאָרסקי, דער מחבר פֿונעם „ווערטערבוך פֿון לשון־קודש־שטאַמיקע ווערטער אין ייִדיש“ און אַנדערע אָנגעזעענע ייִדישע ווערטערביכער.
